Siste nytt frå parfymeverda

No gir eg meg over og legg meg under. Hillary Clinton lanserer ein parfymeserie, under namnet “Autorité”. Duftene skal få menn til å rette seg opp i ryggen og følge med, og ikkje seie noko før dei får beskjed om det. Duftprøver vil bli lagt inn i Elle, The Economist og The New York Review of Books. Nice…

I’ll be anything you need…

Når denne sangen vart spelt på festane på åttitalet (altså ikkje åttitalsfestane) vart dansegolvet stuvande fullt umiddelbart. Folk hoppa utpå og veiva armar og bein rundt i lufta. Herleg! Deilig, usakleg dansing.

Eg diggar Peter Gabriel, mitt næraste forhold til han var raskt forbigåande, eg tok på han då han la seg ut i publikum og rulla seg utover på Kalvøya i 1987. Eg trur det var medan han sang Biko. Ein ta-på-verdsstjerne-opplevelse, altså.

Hiv deg utpå, sving hoftene og la Peter få deg i godt humør med denne energipakken av ein sang.

i hagen min

 

Eg tok nokre bilde her om dagen, og vart så fornøgd at eg må poste dei her.

Her ser du to flotte kvite og purpurfarga kuleprimulaer, eller mikrofonblomster som datra mi brukte å kalle dei då ho var lita.

Den vesle søtingen i same bildet er ein fylt raudveis – ein sjeldan blome som eg har fått av ei god hagevenninne.

Rundt omkring dei veks det ei skuggesildre som kjem til å breie seg utover og fylle bedet når dei to andre er ferdigblomstra.

Her er vårdronninga i bedet mitt, ei burgunder julerose som kombinerer nakkekneising med blygt nedslått blikk. Ikkje så vanleg i menneskeverda, men blant plantane kan altså dei to livsinnstillingane kombinerast.

Rundt tærne har ho nokre iris og ein heuchera, og ein geranium bak og til høgre.

Desse hyllene frå IKEA er perfekte til blomar utandørs, dei er i metall og er svartlakkerte så dei gjer ikkje så mykje av seg. Dei fyller perfekt opp rommet mellom sykkelstativet, inngangsdøra, veggen og aspargesbedet.

Dei har perforerte hyller, så det er uproblematisk å vatne på dei. På hyllene har eg fiolar, to ranunklar, ein timian og nokre potter med løk som held på å kome opp.

 

Din eigen taco

Mi mjølkeallergiske venninne kunne konstatere at det var skummamjølkpulver i tacokrydderblandinga. Kva skal ein stakkar gjere?

Eg heiv meg utpå, og prøvde å lage mi eiga tacokrydderblanding. Den første runden heldt på å utløyse apoplektiske anfall rundt bordet, så sterk var den. Andre runde vart meir balansert, og smakte veldig godt. Slik gjorde eg det:

Heimelaga tacokrydder

2 ts chilipulver

1 ss paprikapulver

2 ts buljongpulver

1 ts urtesalt

1 ts peppar

1 ts spisskummen

1 ts malt koriander

1 ss maisenna

Bland alt det tørre. Oppbevar krydderblandinga på eit tett glas, det går med 1 ss krydderblanding til 400 g kjøt.

Hakk ein løk og to fedd kvitløk fint. Eg hakkar den grovt, og køyrer den saman med kvitløken i ei matmølle slik at det ikkje blir løkbitar i maten. Dette på grunn av dei pysete barna mine, som ikkje likar konsistensen på løk, berre smaken på den.

Brun 400 g kjøtdeig i steikepanna på høg varme. Ha i løken og 1 ss krydderblanding. Slå på 1,5 dl vatn, og rør det heile saman. La blandinga frese til den er ganske tørr og smulete i konsistens.

Server på tradisjonelt tex-mex-vis, med salat, hakka tomatar, rømme og salsa i skjell eller i wraps. Sunt og godt!

Gult er kult

Her er nokre bilde som bør få vere med frå turen til botanisk. Det første er ein enorm forsythia, som står ved den gangvegen som kjem opp frå Jens Bjelkes gate. Det andre er ein vårkornell, og blomane på det tredje bildet er Caltha palyustris Flore Pleno, ein variant av bekkeblom. Dei er fine, sjølv om dei er gule.

Dagens kjønnsskifte

Jørgen Nordlund (38) er i dag ansatt som ny kvinnelig slalåm- og storslalåmtrener i Norges Skiforbund.

Pressemelding frå Norges Skiforbund.

Sur og sylta

Huskar du sitronane eg sylta for nokre veker sidan? No har det gått ein og ein halv månad, og eg opna glaset for å finne ut korleis dette hadde utvikla seg. Eg tok ut ein båt, skylde av den saltet, fjerna fruktkjøtet (som er alt for salt) og skar den i tynne strimlar. Den smakte intenst sitron, salt og godt. Av ein eller annan grunn minte den meg om ein dry martini, eg såg for meg ein slik med ein liten bit sylta sitronskal i staden for ein oliven.

Men sylta sitronar er ein nord-afrikansk, nærare bestemt marokkansk måte å bruke sitronar på. I marokkansk mat vert sitronskalet gjerne brukt for å smaksette rettane ein lagar i den tradisjonelle taginen, ei leirgryte med eit hatteforma lok som ein brukar for å dampsteike kjøtrettar. Særleg rettar med kylling og lam vert servert med ein saus smaksett med sylta sitron.

Når eg no hadde denne skatten i hendene måtte eg altså eksperimentere litt. Eg lagde det eg kallar ei nord-afrikansk gryte, som eg serverte med bulghur. I gryta har eg vanleg chilipulver, men lagde du harissa den gongen eg lokka med hot mat, og ikkje har brukt den opp, så er dette tida for å ta den fram att. Slik gjorde eg det:

Nord-afrikansk gryte

3 ss matolje

400 g kjøtdeig

1 løk

3 fedd kvitløk

1 boks tomatar

1 paprika

½ ts chilipulver eller 1 ts harissa

1 ts malt spisskummen

½ ts kanel

Ein neve frisk koriander

2 båtar sylta sitron

Sukker, salt og peppar

300 g bulghur

3 ss olivenolje

5 dl vatn

1 ss tomatpuré

1 buljongterning

Litt sitronsaft

Varm opp matoljen i ei gryte. Hakk løk og kvitløk fint, og fres dei i gryta på middels varme. Ha i krydderet, og la det frese godt. Ha i kjøtdeigen, og la den frese saman med krydder og løk til den har skifta farge. Rens paprikaen, og kutt den i små bitar. Ha i tomatane og paprika, og la det koke opp. Fjern fruktkjøtet frå sitronbåtane, og skjer dei i tynne skiver som du har oppi gryta. La det heile koke 10-15 minutt. Smak til med sukker, salt og peppar.

Varm opp 3 ss olivenolje i ei gryte, og ha i bulghuren. La den frese i eit minutt eller så. Ha i tomatpuréen, og rør den inn. Slå på vatnet, og rør godt. Ha i buljongterningen og la det heile dampe på låg varme til gryna er møre. Legg gryna i ein haug på tallerkenen med ei dump i midten, og legg kjøtsausen i dumpa.

Når du først lagar eit glas med sitronar kan det vere greit å få nokre tips om andre ting ein kan bruke dei til enn denne gryta. Eg har brukt dei finhakka i aioli og i vinaigrette-dressing, og eg har brukt dei like finhakka i smelta smør til fiskegrateng saman med litt tørka urter. Det siste var overraskande godt. Som pikant dryss på toppen av ein salat fungerer det også veldig bra, særleg i ein luksussalat med skalldyr og asparges. Og så må eg teste ut idéen eg fekk då eg smakte på den første biten, ein dry martini. Skål!

Ekte kjærleik?

-Eller berre ein ti-på-to-gutt?

Ein deilig dag

- i botanisk hage. Magnoliaene blomstrar, og rhododendronen står med lysande rosa knoppar. Vakre primulaer står og vippar med blomen mot sola og oss som ser på. Og kjære. Vakkert!

Den verkeleg store festen – party til 100

Camilla kom med ei utfordring til meg: Kva skal ein servere på fest til 100? Eg er ikkje vond å be, så her kjem mitt menyforslag.

Eg foreslår to salatar, ein gresk og ein libanesisk taboluleh, tre hovudrettar; laks med pesto, svinekam og kjøttbollar i tomatsaus, samt fruktsalat med ostekrem til dessert og ei kake til slutt. (Kake kan du enkelt be andre om å lage. Gje dei gjerne konkrete ønske og volum.)

Litt om innkjøp først: Når ein lagar mat til 100 lønner det seg å kjenne nokon som har tilgang til engros-handel. I Oslo-området og mange andre plassar finst det storcash-butikkar, der ein må ha kort for å handle. Eg har kort der gjennom skulekorpset eg er med å administrere, og det skal ikkje mykje til for å få eit slikt kort. Alle som driv kaféar, restaurantar og kioskar får det, og alle frivillige organisasjonar får det, berre dei har eit organisasjonsnummer.

Ikkje alt løner seg å kjøpe der. Nøkkelen til gode innkjøp er å vite kva ting SKAL koste. Vi blir lurt oftare enn ein trur, men i små volum gjer det ikkje så mykje. Skal du handle til 100 er det snakk om så store volum at å sjekke prisen er avgjerande. Kjøt er til dømes ofte på tilbod på maxi, centra eller hos din lokale slaktar, langt billigare enn i desse engrosbutikkane.

Sjekk prisar i vekene før festen, følg med i annonser og sjå kva som er billig. Finn du kyllingkjøtbollar på tilbod tre veker før, og dei går ut på dato to dagar før festen, så kjøp dei, og legg dei på frys. Det same gjeld svinekammen og laksen. Philadeplhiaost til ostekremen får du i 0,5 kg-boksar på engros, det er også mogeleg at dei kan bestille til deg. Det er lettare å lage ostekrem med fem store boksar enn 13 små.

Gresk salat til 100:

20 liter ferdigkutta salat (engros)

3,5 kg fetaost

3 kg oliven

2 liter hakka raudløk

Dressing av 1,5 liter olivenolje, 5 – 7 dl sitronsaft, 7 dl finhakka løk, 3 ss salt, 1 strøken ss peppar, 3 ss tørka basilikum og 3 ss hakka eller most kvitløk. Køyr alt unntatt basilikumen glatt med stavmiksar. Ha i basilikumen til slutt, og la stå over natta.

Tabouleh:

2 liter grov bulghur

5 l vatn

1 liter hakka persille

5 dl hakka mynte

1,5 l hakka vårløk, gressløk eller prre, gjerne blanda

3 paprika

30 g peppar

100 g salt

6 dl olje

3 dl sitronsaft

Ha gryna i eit lågt, vidt kar, t.d. ei gryte eller ein balje. Bland inn salt og peppar. Kok opp vatnet, og slå det over saman med halvparten av sitronsafta og halvparten av oljen. Bland godt, legg på lok og la det stå ein halvtime. Rør gryna lause, og smak om dei er møre, og om det trengst meir sitronsaft, salt og peppar.  Rett før servering blandar du saman det som er att av sitronsaft og olje, og slår det over. Vend inn urtene, løken og paprikaen. Du kan også vende inn 2-3 beger vaska ruccola.

Kjøtbollar:

10 kg kjøtbollar

10 First price pastasausglas

5 ss sukker

Peppar og salt

Rør ut pastasausglasa i ei stor gryte, og la sausen koke opp. Smak til med sukker, peppar og salt, evnt. meir urter som timian el.l. viss du syns det manglar. Ha kjøtbollane i djupe langpanner, og slå sausen over. La kjøtbollane stå på 180 grader i ein halvtime, då er dei gjennomvarme.

Svinekam:

Kjøp utbeina svinekam, når du skal ha så mykje kan det lønne seg å gå til ein slaktar litt på førehand og be om ein pris, og om at han beinar den ut for deg. Prisen bør ligge rundt 80-100,- per kilo.

12 kg fersk svinekam

12 store glas med sursøt saus

Damp svinekammane under folie, gjerne i salta vatn blanda med vin, i langpanne til kjernetemperaturen er 75 grader. Dette kan du gjere dagen før. Same dag Skjer du svinekammen i tynne skiver. Så varmar du opp sausen, heller den ut på serveringsfata og legg kjøtet i.

Pestobakt laks:

10 kg laksefilet, bein- og skinnfri (Eldorado har frosne 4×125 g filetar, bruk gjerne dei.)

2 kg pesto

5 dl olivenolje

Salt og peppar

Dekk langpanner med bakepapir. Smør på olivenolje, dryss i salt og legg filetane i. Dryss salt og peppar oppå filetane og. Legg på ei raus spiseskei pesto på kvar filet, og smør den utover. Bak fisken på 200 grader i  15 minutt.

Desserten kan du lage tidlegare på dagen, men ikkje dagen før. Laken kan du lage dagen før, og oppbevare i kjøleskap. Eg skrellar ikkje epla og pærene, men vaskar dei godt. Finn eple med fin raud farge, så blir det liv i fruktsalaten. Fjern kjernen med eit melonkulejern.

40 delte eple med kjernen fjerna

40 delte pærer med kjernen fjerna

3 kg små. blå druer

2 liter appelsinjuice

3 dl sitronsaft

1 liter eplejuice

Krydder, sjå nedanfor

Kok opp juicane med 4 stjerneanis, 20 nellikspiker, 10 kardemommekapslar og 10 bitar kanelbork. La dette kolne, og sil frå krydderet. Ta vare på krydderet, det er “pynt” i bollen. Hakk all frukta i passe store bitar, og legg den oppi laken fortløpande. Server med ostekrem.

Ostekrem:

2,5 kg Philadelphiaost

2 kg melis

2 dl sitronsaft

3 toppa ss ekte vaniljesukker

Evnt. litt mjølk viss kremen vert for stiv

Pisk alt saman med handmiksar eller i ein Kenwood. Dette kan gjerast tidleg om morgonen same dag som det skal serverast. Rør det opp på nytt like før servering.

I tillegg kan du kjøpe inn 8 brød (700-800 g), og 1 kg smør. Ja, det ser lite ut, men du skal sjå det blir nok. Kaker ber du som sagt andre bake, du kan t.d. be om seks langpanner, det er meir enn nok. søk her i bloggen på langpanne, så får du masse treff.

Du må ha med deg tre dugande arbeidsfolk i komitéen, for det er ein del kutting og rensing her. Men dette skal vere gjort på ein dag, pluss ein dag til innkjøp og planlegging. Sjekk ut allergiar og intoleransar. blant gjestane dine. Denne menyen er ganske safe, skal du supplere med noko måtte det vere ei mjølkefri kake (Sjekk ut den med kokte appelsinar) og ein skikkeleg vegetarrett. Lykke til!

Dette tok ikkje heilt av…

Invitasjonen min til spørjerunde var ikkje nokon kioskveltar, sjølv om mange var innom her i går. Det er vel berre GundaM som har kome med eit skikkeleg spørsmål til meg, og det er slik: 

Da kommer jeg med et spørsmål; Hva parfyme vil du anbefale til meg tror du…? Må innrømme jeg liker bedre mannfolk parfyme enn dameparfymer. Før gikk jeg med Chanell men nå… Klem i natten til deg 

Eg er også fascinert av herreparfymar, så eg har prøvd litt forskjellig. Du seier ingenting om kva for ein Chanel du har gått med før, det er så mange. Men i allfall: Dei herreduftene eg har presentert her i bloggen er Karl Lagerfeld Kapsule-duftene, Bulgari Black og Miller Harris Feuilles de Tabac.  Feuilles er vel teknisk sett ei unisex-duft. Felles for desse tre er at dei er av den orientalske, krydra, varme typen.

Eg skal nemne to til, nemleg Calvin Klein Obsession for men og Chanel Egoïste. Obsession for men er det nok ikkje mange damer som går med, men Egoïste er ganske vanleg å bruke til “cross-perfuming”. Grunnen til at eg nemner dei begge er at eg kjenner ei som brukar den første, ein liten drope bak kvar knehase (!!) og ho luktar fantastisk. Eg prøver Egoïste når eg har høve til det, og vil nok kjøpe meg ei flaske før eller seinare.

Dei to duftene delar ganske mange notar, men patchulien i Obsession gjer den særeigen og intenst varm, meir hippie-prega. Egoïste har den same kombinasjonen av florale notar som rose og nellik, og krydder, som kanel og koriander, men den er noko meir treaktig og elegant. Davidoff Adventure er ei anna av desse woody-spicy-oriental-duftene som tiltalar mange damer.

Dersom herreduftene du likar er av den friskare typen vil eg anbefale deg å prøve L’eau d’Issey for men, Creed Royal English Leather og Kapsule Light. 

No er sikkert GundaM glad, når det gjeld alle dei andre som har vore innom måtte eg ty til søkeorda for å finne ut kva dei lurte på. Her er resultatet: 

ambre roseparfyme – Ein klassisk kombinasjon, som du vil finne i mange av dei mest kjende duftene som Chanel No. 5, L’Air du Temps, Must frå Cartier, Anaïs Anaïs og YSL Paris. Ein ny versjon er JLo sin Glow, ein moderne klassikar.

annakanne er det annakanna.blogspot.com du leitar etter? Kjempefin USA-basert designstudentblogg.

arkitektens trøst – Eigentleg ein plante, Polygonum baldschuanicum. Ein fin klatreplante som skal skjule skavankar og feilkonstruksjonar – innan rimelege grenser.

biff til mange – Eg heilsteiker den, og skjer den i skiver. Alltid enklast, og du kan få til ei rosa kjerne som dei fleste kan like.

billig og god mat konfirmasjon – Sjå denne. Lykke til!

bryllupsparfyme – Eg har berre gifta meg ein gong, men eg sverga til “min” parfyme, den som var meg på den tida. Viss du vil ha ein spesiell til bryllupet ville eg ha foreslåttat du bør prøve Estee Lauder Beautiful, Stella McCartney Stella, J’adore, Victor & Rolf Flowerbomb eller Narciso Rodriguez EdT. Dei er alle florale, oppløftande, ikkje for påtrengande men samstundes til stades.

ekte vaniljesukker – Veldig viktig. Tørsleffs. ICA Maxi, Centra eller Meny.

ertesuppe med ferske erter – som ertepuréen min, men meir utspedd, og kanskje meir krydra? Prøv!

estetique sandvika – Fint parfymeri.

festmiddag “ferdig på forhånd” – Ikkje så lett, men ting som går inn i omnen i form er alltid enkelt, som pestofisk eller heilsteikte kjøtstykke. 

går sukker ut på dato – nei.

grønn genser portvin – Grønn genser var ei dame som gutta på forelesning på jussen var veldig opptekne av. Og ei bergensk marsipankake, trur eg. Har ikkje oppskrift. Går sikkert strålande til portvin og vice versa.

gryter som ikke svir – Eg er fornøgd med Eva Trio, her må ein berre prøve seg fram. Kanskje ein kunne få gryter på heimlån?

hva er tahine? – Sesamfrøpasta, vert brukt åleine og t.d. i Hummus. 

hvordan kjenner en acetonlukt – Neglelakkfjernar? Litt sånn mandelaktig, meiner eg å huske?

joni mitchell emo blue – Ja. 

kanel allehånde moussaka – Eg brukar kanel i moussakaen min, men ikkje allehånde. Kanskje ville det vere godt?

koking fersk pasta – Stor gryte, halvfull med vatn, gjer at det ikkje kokar over.

kompliment i bogstadveien – Får eg ein gong i blant, mellom anna av frisøren min, ein strålande fyr.

lag ei fin dame sjølv – Her er eg heilt i villreie. Vanskeleg å lage damer. Dei kjem i liten storleik først.

leve billig mat  - Her. 

pakke en kake – Bruk ei papplate som du skjer til, dekk den med folie eller kakeserviett. Ein steikepose er fin til å dra over.

rose ikebana kjøpe – Hermes, Stein og Straum, deilig duft.

saftige boller enkle barn – denne oppskrifta gir nydelege bollar, enkelte ville kanskje også kalle dei saftige. Men enkle barn, det må du ordne med sjølv.

semulegrynsgraut – Ha passe mengde gryn i mjølka medan den er kald. Rør medan den vert varma opp. Smak til med litt sukker, salt og ein liten klatt smør. Mmmm!

skyldskifte – I den gamle matrikkelen vart ein eigedom sin relative storleik ift heile landet registrert. Denne andelen vart oppgitt i eigedomen si “skuld”. Eit skuldskifte er ei oppdeling av eigedomen basert på denne relative andelen. Ikkje heilt påliteleg, altså. Matrikkelen er oversikta over alle eigedomar og kven som eig dei. Grunnboka er oversikt over tinglysingar knytt til eigedom. Jammen er jussen nyttig i blant.

tage andersen københavn – Fin butikk, kreativ mann. Perfekt besøksmål.

teknikk ved baking med smør og sukker – Nokre oppskrifter seier “rør smør og sukker hvitt”. Det blir aldri kvitt, men litt lysare gult kan det bli. Andre oppskrifter seier lag eggedosis, og ha i smelta smør saman med mjølet. Den første metoden vert brukt til tyngre, saftigare kaker. Eggedosis pluss mjøl og smør vert brukt når ein vil ha eit lettare resultat.

vaffelrøre i brusflaske settes i kjøleskap – Det går fint. No til dags kan ein også bruke mjølkekartongar med skrukork. Lett å frakte og å pakke tett, og lett å porsjonere i vaffeljernet. 

20 000! :D

Utruleg, i løpet av dagen passerer eg 20 000 besøkarar! Då eg passerte to vekers blogging lovte eg å svare på alle spørsmål eg fekk, og jammen fekk eg ein del. Kanskje kan eg få fleire no?

Altså: Har du spørsmål som du trur eg kan svare på, så fyr laus, så skal eg gjere mitt beste. Bloggen handlar om mat, parfyme, musikk og hage, men eg har berre overfladiske kunnskapar på alle desse felta. Det hindrar meg ikkje å synse i veg, så spør, så får du vurdere om svaret er brukande!

 

 

Ut i sola

Eg veit at eg har lesarar over heile landet, så eg skal ikkje gni det inn, men resten av dagen skal tilbringast UTE. Her er fredagsblomane mine, flammande papegøyetulipanar. Ha ei fin helg, alle de gode menneska som stikk innom! 

Store ambisjonar – festmiddag

Dei siste dagane har eg fått veldig mange søketreff på konfirmasjon. Det er tydeleg at mange planlegg dette overgangsritet på denne tida, og treng inspirasjon til mat som kan serverast. 

Mange har også søkt på “billig mat” konfirmasjon. Tidene er trangare enn på lenge, og mange kan ikkje legge ned store summar i ein konfirmasjonsmiddag. Samstundes kan ein vere rådlaus når det gjeld kva ein bør servere.

I fjor lagde eg konfirmasjonsmiddag til sonen til ei venninne, og eg brukte 1500,- på ein middag til 25 personar. Då serverte eg ei soppsuppe til forrett, heilsteikt entrecote med bakte grønsaker, saltkokte poteter og rauvinssaus til, og pannacotta med jordbærsaus og honningkaketoast til dessert. Eg lagde honningkaka, soppkrafta og sausen på førehand, og vertinna lagde pannacottaen dagen før. Alt det andre gjorde eg og to til (men det hadde vore nok med ein til) klart same dagen. 

Det eg postar i dag er handlelista eg brukte, samt arbeidsplanen. Det gjer eg for å vise at dette er overkomeleg, og for å vise korleis ein plan kan sjå ut. For å få til dette må ein, sjølvsagt ikkje mor (eller far) til konfirmanten, stå på kjøkkenet heile dagen. Tenk over kven du har rundt deg som verkeleg likar å lage mat, og som ikkje skal vere gjest i konfirmasjonen. Dei fleste vil bli smigra over å bli spurt, det er ei ære å få vere med på å lage til festen på ein så spesiell dag. 

Merk at eg opererer med to steikeomnar. Det er strengt tatt ikkje nødvendig. Du kan bake grønsakene tidlegare, slå ned temperaturen, sette inn kjøtet og etter at det er ferdig kan du skru opp att og varme grønsakene litt ekstra før servering. Men har du tilgang til å låne steikeomn t.d. hos ein nabo, er det enklare.

Her er handlelista:

Til forretten:

1 kg aromasopp (halvparten til kraft, andre halvparten steikt til garnityr)

1 løk

2 gulrøtter

Soyasaus

Ein purre

Ein skalk selleri

1 liter fløte

Sitron

Til hovudretten:

2,5 kg entrecote

3 kg nypoteter

5 raude paprika

4 løk

2 store pastinakkar

2 pakkar sukkererter

1 flaske billig raudvin

5 pakkar TORO raudvinsaus

Til desserten

4 liter kremfløte

Ekte vaniljesukker

2 pakkar gelatin

500 g honning

1 kg sukker

mjøl og krydder til honningkake

 Generelt:

Olivenolje

Salt

Peppar

Bakepapir

Alufolie

 

Arbeidsplan vertinna

Laurdag føremiddag

Lage pannacotta

Sjekke at vi har aluminiumsfolie, salt, olivenolje og bakepapir

Laurdag kveld

Ta ut entrecote av kjøleskapet

Skrelle (men ikkje skjere opp) løk

 

Arbeidsplan kokken

Fredag (eller tidlegare)

Lage soppkraft

Lage saus

Bake honningkake

Søndag morgon

Ankomst: 10:00

Ta fram alt som skal brukast, gjere kjøkkenet klart.

Sett den eine steikeomnen på 140°c

Sett den andre steikeomnen på 200°c

10:40 Ta smør ut av kjøleskapet, fordel i skåler

10:50 Frese entrecoten i steikepanne

11:00 Sette entrecoten i omnen 140°c med termometer, salt og peppar

11:05  Dele opp løk

Rense paprika

Skrelle pastinakk

Rense sukkererter om nødvendig

Vaske poteter

12:15 Steike aromasopp i smør

12:30 Skjere opp og toaste honningkakeskiver

12:50: Vende paprika, løk, pastinakk og sukkererter i olje og krydder

Ta jordbær ut av frysaren

13:00 Sette paprika, løk, pastinakk i omnen (langpanne, bakepapir) omnen på 200°c

13:05 Sette på potetvatn

13:20 Sette på potetene

13:30 Legge inn sukkerertene

13:40 Ta entrecoten ut av omnen, la kvile

13:45 Varme soppkrafta, ha i 1 liter fløte og smak til

13:55 Ha soppsuppa i skåler, garnere med aromasopp. serveringshjelp ber skålene inn rett før gjestane går til bords.

14:00 Varme sausen, smak til

14:05 Skjere opp kjøtet i skiver

14:45 Ny serveringsrunde

(Talar)

15:00 Køyr jordbær i miksar med 2 ss sukker

15:05 Ta ut pannacotta, anrett med jordbærsaus og honningkaketoast og server

 

Arbeidsplan serveringshjelp

Ankomst søndag kl. 12:00

Oppstilling av serveringsfat og serveringsbestikk

Oppstilling av glass til aperitif på brett

Oppstilling av ekstra glass, servise og bestikk på buffet

Dekke bord

Skjere opp og sette fram brød og smør til suppa, dekk brødet med reine kopphandkle

13:40 Skjenke aperitif

 13:45 Servering av aperitif (eplemost og farris) (sei at folk må behalde glasa sine)

15:50: Slå vatnet av potetene, la dei dampe under klede

13:55: plassere ut suppeskålene

14:13: Hente inn suppeskålene

14:15: legge opp grønsaker

14:17: Fylle sausenebb

14.20 Server kjøtet

14:45 Andre serveringsrunde

15:00 Hente servise etter middagen

15:05 server dessert

15:30 Lage kaffe

Denne planen fungerte veldig bra, det vart ikkje stress, men nok tid til alle operasjonar, og dei som sat til bords koste seg storveges. Lykke til med din fest, om det er konfirmasjon, namnedag, dåp eller ganske enkelt eit heidundrande party!

Heime – på ordentleg

Eg har aldri elska heimkommunen min utan atterhald. Kanskje gjer ingen det? I oppveksten orienterte eg meg meir mot Ulsteinvik og Volda, ikkje mot “fiskarane” i ytre delen av kommunen. Men kvar gong eg kjem heim undrar eg meg over kor verda går framover, også der.

Det er mykje eg kunne seie om rask rikdom, vått ver og andre faktorar som verkar inn på livet der, men eg skal ikkje gå inn på det no. Eg vil vise dokke denne filmen, som krinsar om Herøyspelet, naturen, folket og vaflene. Den viser solsida av livet der, og den er jammen verd å vise fram. Følg ekstra godt med rundt 3:00, det er heimbygda mi. Fint, ikkje sant?

Ukrut i hagen

Slit du som eg med skvallerkål i hagen? Tyskerkål kallar nokre den, prestegardsugras er eit anna namn den er kjent under.

Aegopodium podagraria heiter den på latin, og som namnet seier skal den ha ei viss effekt mot urinsyregikt. Dei fleste ser på den som ei plage, sjølv om enkelte entusiastar samlar på ein variegert (brokblada) type som visstnok ikkje skal vere så invaderande. For invaderande er verkeleg rett adjektiv på denne planta. Den spreier seg med røtter og med frø, og tek kreftene og til slutt livet av dei fleste vekstar den hamnar saman med.

No har eg lært meg å leve med skvallerkålen, og det gjer eg ved å ete den. Små, spede skvallerkålblad smakar som spinat, og kan brukast i salatar, stuingar og supper. Her skal du få oppskrift på ein pai med skvallerkål og oliven, og ei suppe.

Skvallerkålrettar smakar best når du brukar nye skot. No tidleg på våren er det lett, då er det berre å plukke i veg. Når den er i god vekst kan det lønne seg å klippe over med grasklippar eller kantklippar, og etter nokre få dagar har du masse fine små blad som kan brukast i maten. Du finn også mindre blad nede mellom dei grovare, så det kan vere lurt å ta ein runde før du slår det heile ned.

Plukkar du i porsjonar, kan du dampe det inn, og fryse det til du får nok til ein god middag.

Skvallerkålpai

300 g kveitemjøl

150 g smør

2 ss vatn

1 liter fersk skvallerkålblad eller 3-4 dl dampa

2 dl vatn

1 ss smør

Fire egg

2 dl matfløte

2 dl riven ost, gjerne jarlsberg eller cheddar

Ei fingerlengd av det kvite frå ein purre

2 ss hakka løpstikke viss du har, persille kan og brukast

20 svarte oliven utan stein

Salt og peppar

Køyr smør og mjøl saman i ei matmølle. Ha i vatn, og la mølla gå litt til, slik at deigen samlar seg om kniven. Dette må gå fort, deigen skal ikkje bearbeidast slik at den vert seig. La deigen kvile i kjøleskapet i plast ein times tid.

Sett steikeomnen på 200 grader. Ha 2 dl vatn og ei halv teskei salt i ei gryte som du har tett lok til. La det koke opp, og ha i skvallerkålen. La den dampe to-tre minutt på høg varme. La den renne av, og hakk den fint på ei fjøl. Hakk purren og persille/løpstikke fint. Knekk egga i ein bolle, og ha i fløte, salt og peppar. Rør det godt saman. Kjevle eller trykk ut paideigen, og legg den i ei form. La den ikkje bli for tjukk nokon stad. Ha i skvallerkål, purre, urter og slå eggeblandinga over. Strø ost på toppen, og steik paien litt under midt i omnen på 200 grader i 30 minutt. Vil du ha meir ”mat” i paien, kan du ha i skinke, steikt bacon eller strimla røykalaks. Server med ein god salat til.

Skvallerkålsuppe

Snautt 2 liter skvallerkålblad eller 5 dl dampa

3 ss smør

2 ss mjøl

Ein liten løk

1 liter vatn

To ss flytande buljong, eller 2 ts buljongpulver

2 dl fløte

Salt, peppar og muskat

Finhakk løken. Hakk skvallerkålen grovt. Smelt smøret i ei tjukkbotna gryte, og ha i løken. La den frese utan at det vert brent, og så rører du inn mjølet. Slå på vatn, og la det koke opp. Ha i skvallerkål, buljong og fløte, og la det koke i 6-8 minutt. Køyr suppa glatt med ein stavmiksar. Smak til med salt, peppar og litt riven muskat.

Server med godt brød til. 

Grønt på kontoret

Nei, dette handlar ikkje om å så urter eller sommarblomar på kontoret, men korleis ein kan gjere sitt for at arbeidsplassen ein er på belastar miljøet minst mogeleg. Eg er “miljøansvarleg” der eg jobbar, og held akkurat på med ein plan for korleis vi kan redusere søppel og energiforbruk, samt gjere meir miljøvennlege innkjøp og reiser. Denne videoen inneheld ein heil del tips som er praktiske å ta med seg.

Vinduslufting ville nok få vårt ventilasjonssystem til å slå krøll på seg, men elles er det meste her gode tiltak for å skape ein grønare arbeidsplass. Kanskje noko du kan foreslå der du jobbar?

Appelsinkake

Her kjen endå ei av desse fine langpannekakene som kan delast opp i fire til kakelotteri eller i snippar til 17. mai, konfirmasjon eller til loppemarknad.  Eg brukar same basisrøre som i mine mor monsen/tosca-oppskrifter, men denne er dobbel storleik til full langpanne. Slik gjer du det:

Appelsinkake

6 egg

6 dl sukker

2 dl rømme eller kesam

1 dl mjølk

9 dl kveitemjøl

4 ts bakepulver

250 g smelta smør

Visp egg og sukker til eggedosis. Bland i rømme/kesam og mjølk. Bland mjøl og bakepulver, og sikt det i medan du rører jamt og trutt. Ha i det smelta smøret til slutt. Denne porsjonen passar til ei vanleg langpanne.

I tillegg treng du;

Ein appelsin

100 g firkløver

50 g smør

0,5 dl mjølk

150 g melis

Sett omnen på 180 grader. Kle langpanna med bakepapir. Vask appelsinen godt, og tørk den. Riv det ytterste, oransje skalet av på eit rivjern eller med eit zest-jern, og bland det i mjølet. Press safta av appelsinen, og bruk det i røra i staden for same mengde mjølk. Lag basisrøra slik det står over, og hell den i forma. Steik kaka på 180 grader i ca. 25 minutt. Sjekk med kakenål om den er ferdig. Lag glasuren medan kaka steiker. Dobbelvend kaka, og la den kolne. Smør på glasuren, og del kaka opp i pene snippar.

Lykke til med kakebakinga, og husk at delt glede er dobbelt glede! Dei heime får kose seg med dei avskorne kantane… 

Paté, postei, rillette, creton

 

Kjært barn har mange namn, det har eg konstatert her tidlegare. I dag har eg blitt inspirert av Jakob til å presentere mi favorittoppskrift. Paté og postei er vel stort sett det same, men nokre hevdar at det er meir kjøt og mindre spekk i patéane enn i posteiane. Om det stemmer veit eg ikkje. begge delar kan serverast lunt eller kaldt.

Rillette er ein fransk form for postei der kjøtet er kokt i feitt, og så arbeidd saman til ein slett masse som stivnar. Creton er den fransk-kanadiske versjonen av det same. Det som er att av feittet vert gjerne hatt på toppen for at posteien skal halde seg lenger. Confit, som ein ofte kan få av andekjøt, er byrjinga på ein rillette, då er kjøtbitane ikkje mosa, men heile liggande i feittet.

Sånn sett er min leverpostei nærare ein rillette enn ein paté, i og med at eg gjennomvarmar levra før eg køyrer den glatt med feittet og har den i former.  Leverposteien min er med kyllinglever, og den er definitivt av den lettvinte men kjempegode typen. Den skal ikkje steikast i omn, så når den er ferdig kan du ha den i kva som helst slags skål som du syns er fin.

Lag gjerne dobbelt porsjon når du likevel er i gang, viss du vil ha i frysaren (utan aspik og pynt) eller gje bort til vennar og kjende. Eg lagar alltid ein stor porsjon postei til jul, fordeler i skåler og gir bort til dei eg syns fortener det mest. I ei stor form er den fin på eit koldtbord eller ein buffé. Du kan også smøre den på små toastar, og servere den som forrett til ein fin middag pynta med urter og litt aspik.

Oppskrifta er min bearbeidde versjon av den mi matheltinne Anna Bergenström har i yndlingskokeboka ”Vinterens gode ting”. Berre tittelen på boka gir meg livsmotet tilbake når det er som mørkast. Finn du boka på loppis eller antikvariat så kjøp den, den er fantastisk. Men du kan like gjerne lage patéen no på våren, dette er ikkje berre vintermat.

Eg gir posteien ein fransk smak og lekker farge med dei soltørka tomatane. Slik gjer du det:

Kyllingleverpostei/rillette

400 g (ein pakke) kyllinglever

100 g finhakka bacon

1 mellomstor, finhakka løk

3 soltørka tomatar

3 ss mjukt smør

1 ts timian eller provencekrydder

1,5 dl fløte

Ei klype kajennepeppar

Salt og peppar

Ein pose aspikpulver

Vatn

Lag aspiken slik det står på posen, og set den til kjøling. Legg dei soltørka tomatane i kokande vatn. Tin kyllinglevra. Fres løken og baconen med litt av smøret i ei stor steikepanne. Ha i urtekrydderet. Legg i kyllinglevra, og la den steike i 5-10 minutt, til den er gjennomsteikt. Det er veldig viktig, skjer kvar leverbit i to, og steik den litt til viss den ikkje er ferdig.

Hakk dei soltørka tomatane fint, og ha dei i panna. Hell over fløten, og la det heile surre nokre minutt til. Avkjøl det heile litt. Mos alt i matmølle med det mjuke smøret, og smak til med salt, peppar og kajenne.

Ha leverposteien i pene skåler, og hell over aspik som du har smelta i kokande vatn etter oppskrifta på pakken. Legg knust, rosa peppar, persilleblad, laurbærblad og kva du elles vil pynte med i aspiken. Når det første laget med aspik har stivna, slår du på litt meir, slik at pynten og vert dekka.

Server på godt brød med sure agurkar, raudbeter og gjerne litt meir aspik som du hakkar eller skjer i skiver. Posteien held seg i 5-6 dagar i kjøleskapet. Dekk den til med plast.

Lagar du meir enn du klarer å spise opp på 5-6 dagar så kan du fryse posteien i småporsjonar, til dømes i slike små eldfaste former. i så fall bør du droppe aspiken, den trivest ikkje så godt i frysar.

Ostesufflé

Her kjem endå ei Heidi-oppskrift, denne gongen har ho laga ostesufflé. Kast deg utpå, og prøv ein gamal, fransk klassikar!

Alt godt

Det er ikkje så ofte eg lager sufflé. Lenge trudde eg at det var for vidarekomande, men det var før eg laga min første. Har du aldri laga sufflé før har du gått glipp av ein god smak!

Å lage sufflé er ingen heksekunst. Men før eller seinare dett han ned. Spørsmålet blir berre kor lenge du klarer å halde han luftig. Av og til dett han ned allereie i omnen, og er du heldig får du han på bordet før han kollapsar. Heldigvis det er gjestane som skal vente på suffléen og ikkje omvendt. Men merk deg at han er like god høg som lav.

Eg prøvde lenge å lage ostesufflé frå eit reklameblad, men feilen var at oppskrifta innheldt alt for mykje ost. Dette oppdaga eg ein gong eg hadde for lite. Dei fleste har ei suffléform ståande på kjøkkenet nærmast ubrukt, ei høg rund form med rette kantar som er om lag 24 cm i diameter. Har du inga er det kanskje på tide å skaffe ei! 

Å lage sufflé er like enkelt som å lage kvit saus. Du tilset i tillegg berre litt  riven kvitost og stivpiska eggekviter. Eg brukar å servere kvitløksbrød og salat til. Til kvitløksbrødet kjøper eg ein ferdigsteikt loff og skjer han i skiver som heng saman på undersida. Så tek eg litt smør i ei skål og blandar inn hakka kvitløk og smører dette på skivene. Til slutt pakkar eg loffen inn i aluminiumsfolie, men har ei opning på toppen utan folie slik at loffen får ei sprø skorpe.

Ostesufflé

3 ss margarin

4 ss kveitemjøl

3 dl mjølk

4 eggeplommer

200 gram riven ost

4 stivpiska eggekviter

litt pepar, salt og muskat

Smelt margarin, ta panna vekk frå plata og rør inn mjølet. Spe med mjølka og visp godt slik at alle klumpar forsvinn. Kok dette til ein tjukk saus. Avkjøl og rør inn eggeplommer og riven kvitost. Skjer dei stivpiska eggekvitene inn til slutt. Ha røra i ei smurt suffléform og steik han ved 175 grader på nederste rille i 50-60 minutt.

Ein vårsalat

Dette er min favorittsalat. Det er ei god blanding av det eg brukar å ha i hus no på våren.

Riven gulrot

Snitta hovudkål med ostehøvel

Ein boks mais

Hermetiske ananas

Nokre tomatar

Riven sellerirot eller stangselleri

Rosiner

Tørka oregano og timian. 

Litt salt og pepar

Slå litt appelsinjuice og salt og peppar over til slutt, og strø tørka kryddergrønt på toppen

Vil du gjere det endå enklare så set du stenger av stilkselleri i eit høgt glas og legg heile reddikar i ei skål ved sidan av. Ypperleg til å knaske ved sidan av suffléeen og kvitløksloffen. 

Charlie by Revlon

Denne parfymen hadde eg på åttitalet, men det er ikkje dufta eg huskar best. I parfymeriet i Ulsteinvik, der eg var innom støtt og stadig, delte dei ut ei slags reklameavis for Charlie, som var den første beskrivelsen eg såg av kva det innebar å vere ei karrierekvinne. Denne avisa gjorde at eg strakk meg ein halvmeter trur eg, og eg slukte kvart eit ord i den.

Det var lange lister med kva ei Charlie-kvinne gjer og ikkje gjer, eg huskar aller best denne: En Charlie-kvinne har en klokke – og bruker den! Litt utløpt på dato no, men det er morsomt å sjå tilbake på den tida då det å ha på eit armbandsur var uttrykk for å vere moderne.

Eg fann denne Charlie-filmen nyleg, og den er også eit døme på kva type kvinne denne parfymen var retta mot: 

At filmen har Sharon Stone i hovudrolla er berre ein bonus.

Og dufta? Bilverkstadnotane er med for full musikk, med dagens terminologi ville ein vel seie at den luktar ganske kjipt. Enkelte meiner den kan minne om Chanel no. 19, eg trur vel kanskje det er ein fornærmelse mot fru 19. For meg er det aldehydane og den intense opninga med estragon som gjer at denne ikkje er aktuell lenger. Den er faktisk å få tak i, den siste flankeren kom i 2001. Vonaleg er den meir velkomponert og “i tida” enn den første Charlie var. Men viss den ga lov til å gjere dette, så hadde den vel noko ved seg…

Frittata

Etter at eg for nokre år sidan kom til at eg ikkje måtte gå på ski fordi om mor mi ville det, har påska fått ein heilt ny verdi i mitt liv. Eg feirar bypåske, besøke-familie-påske  og i år feira vi reise-til-våren-påske. Snøen låg framleis i hagen då vi pakka bilen og vende nasen mot Danmark. Grønt og vent var det der, og blomane var komne mykje lenger enn her hos meg.

I butikkane var det knallraude, solmodne tomatar frå Spania, små, søte sukkererter og eg fann dette vinhavet som dei snakkar om i EU. Du har sikkert høyrt at dei held seg med eit smørberg, eit vinhav og ulike andre oppsamlingsstader for overproduksjon frå den europeiske landbruksmarknaden. Vinhavet ligg og skvalpar i butikkane på grensa mellom Danmark og Tyskland, der kostar 10 liter raud vin i pappkartong 70 kroner. Det er ganske sikkert ikkje første klasse, men førsteklasses vin var jammen ikkje dyr den heller.

Så vi gjekk inn i sydlandsk modus, og koste oss med europeisk overproduksjon av toppkvalitet. Kloke av skade tok vi med oss egg. Dei danske egga er ikkje til å stole på, og reservemora mi i Berlin seier alltid at ein berre skal lage majones av egg frå høner ein er dus med, så dei tyske er vel ikkje heilt trygge dei heller. Eg syns det er trist å sjå begera med pasteuriserte eggeplommer i danske butikkar.

Vi sette att eit brett med friske, norske egg, så våre danske vener kunne kose seg med ekte aioli for ein gongs skuld. Nokre fordelar skal ein ha i dette annleislandet, deriblant garantert salmonellafrie egg.

Ein spansk frittata var noko av alt det gode vi putta i oss der vi var midt i det europeiske matfatet. Ferske nypoteter frå Hellas, norske egg og tysk katenschinke kombinert med spanske tomatar og italiensk mozarella lagd av bøffelmjølk – ekte bondekost for frosne nordbuarar.

Frittata er ein omelett med poteter og løk, og det høyrest ikkje veldig spennande ut. Men det smakar fortreffeleg som tilbehør til noko meir smakssterkt. Retten finst i mange variantar i ulike matkulturar. Jansons fristelse, der potetene får følgje av mykje fløte og ansjos er ein variant. Den har du sikkert lese om her tidlegare. For meg er frittata eit døme på at det enkle ofte er det beste. Slik gjer du det:

Frittata

8 poteter

6 egg

6 toppa ss kremost, gjerne av geitemjølk (Snøfrisk el.l.)

4 ss reven parmesan

salt og peppar

Skinke

Olje

Rosmarin

Skrell potetene, og skjer dei i halvcentimetertjukke skiver. Kok dei i 5 minutt, og la dei renne av. Pisk egg, kremost og parmesan saman. Smak til med salt og peppar.

Legg potetene i ei ovnsfast panne eller eit fat smurt med olje eller smør. Ha eggemassen over. Strø over skinkestrimlar og litt frisk rosmarin. Steik det heile i 200 grader varm omn i 15 minutt. Det kan hende at steiketida vert lengre viss forma du brukar er lita i omkrins.

Sjekk at eggemassen er stiv i midten før du tek forma ut.  Server med ein tomatsalat med god dressing, meir skinke og eit godt brød. Frittataen kan også serverast heilt vegetarisk, utan skinke.

No byrjar tomatane endeleg å bli søte igjen, tomatar rundt jul er ei sørgjeleg affære. Sjå om du finn cherrytomatar, dei er ofte dei søtaste og beste. Eg lagde ein salat med tomat, løk og bøffelmozarella. Skilnaden mellom mozarella lagd på bøffelmjølk og mozarella lagd på kumjølk er himmelvid, så finn du bøffelutgåva så kast deg over den.

Vanlegvis et vi denne salaten med krysta sitron, ein god olje og salt og peppar over. Men sidan hovudretten, frittataen, er så mild i smaken lagde eg ein god sennepsdressing til som løfta det heile mange hakk. Prøv denne til alle milde salatar, finn du endive eller hjartesalat kan du gjerne bruke dressingen som dipp, og gje kvar rundt bordet si eiga skål til å dyppe dei lange, lyse og sprø salatblada i. Slik lagar du dressingen:

Sennepsdressing

Ei eggeplomme

2 ts sennep, middels sterk

2 ts honning

saft av ein halv sitron

1,5 dl olivenolje

salt og peppar

Ha eggeplomma i ein bolle saman med sennep, sitronsaft og honning. Pisk det saman. Ha i nokre dropar olje, og la det bli ”sugd” opp av eggeblandinga før du har i litt til. Tilsett resten av oljen dropevis til du har ein jamn dressing. Smak til med salt og peppar. Sjekk om det trengst meir honning eller syre. Sitronen kan byttast ut med to-tre spiseskeier god eddik, men ikkje balsamico i denne oppskrifta.

Denne dressingen er ein emulsjonsdressing, altså ein dressing der emulgatoren ( idette tilfellet eggeplomma) får oljen og væska til å blande seg til ein jamn saus som ikkje skil seg. Eg brukar vanlegvis miksar når eg lagar emulsjonsdressingar. Denne gongen hadde eg ikkje det, men det gjekk fint med berre visp og, i og med at det ikkje er så frykteleg mykje olje som skal piskast inn.

Honningen kan og vere emulgator åleine, så har du ikkje egg kan du lage denne dressingen utan. Vil du ha den heilt jamn med berre honning bør kanskje den elektriske vispen fram.

Løft meg opp og ut

I dag skulle eg ut på hagemesse med nokre av venninnene mine, og eg skulle halde på i hagen etterpå. Eg sto og kika inn i hylla der parfymene mine sto, og plutseleg såg eg klart og tydeleg kva som skulle vere dagens duft; Lancome Aroma Tonic. Det er ei grønn, frisk duft, som i tillegg til å ha dette friske ved seg også har eit hint av krydder.

Den opnar med den sprudlande og komplekse dufta av lime, og så utviklar den seg i ei varmare retning. Eit hint av ingefær og kardemomme gjer at den har sødme og bitterheit i ein velbalansert komposisjon. Den held lenge, sjølv om den berre er ein “splash”, ikkje ein ekte parfyme.

Den løftar meg verkeleg opp og ut når eg treng det, den har noko markant naturleg ved seg. Det følest ikkje jålete å ha på seg denne på ein skogstur, det følest berre rett. Eg har ikkje funne den i Norge dei siste åra, men i København veit eg dei har den på Magasin. Prøv den om du fær forbi, den er ei ekte opp og ut-duft. 

Oppdatering: Eg har gravd meir i Lancome sine nettsider, og den er utgått derfrå. Så finn du den, og likar den, så kjøp!

Bildet er frå www.lancome.com

Dagens enklaste

Opp og hoppe, dagen ligg solstrålande og fin framfor oss, og eg skal på hagemesse på lillestrøm og heie på desse damene, og ta med meg nokre fine hageskattar heim. Men først skal eg ha frukost, ein ekte søndagsfrukost. I dag har eg lyst på ein omelett, og ikkje av dei tjukke, brunsteikte, men ein som berre så vidt har spasert forbi komfyren. 

Eg likar ikkje omelettar som har tjukk brun skorpe under, og då må ein lage den med lett hand. Det er viktig å ha litt feitt i panna, og å bruke jamn, låg varme. For meg kan omeletten gjerne vere ganske naturell, eg likar den med berre litt riven ost på.

Du kan også ha på bacon, då ville eg ha steikt baconet først, teke det ut og steikt omeletten i baconfeittet før eg har kjøtet på omeletten til slutt. Krydderurter av ulikt slag er også godt i ein omelett, tilfeldigheitene ville at eg ikkje hadde det i dag. Til omelett brukar eg helst friske urter, tørka passar ikkje så bra, syns eg. Hakka paprika, vårløk eller purre er også godt i omeletten. Slik gjer eg det:

Omelett til berre meg 

2 egg

2 ss kaldt vatn

1/2 ss smør

1/2 ts salt

Nykverna peppar

Riven ost

Pisk saman egga med salt, peppar og kaldt vatn. Set ei lita steikepanne på middels varme, og la smøret smelte i den. Dryss på den rivne osten, og det du elles måtte ha lyst til å ha i omeletten. 

La omeletten kvile litt på låg varme, gjerne under lok, til den har den konsistensen du likar. La den gli over på tallerkenen din, og vipp eine halvdelen over på den andre slik at omeletten blir til ein halvmåne på tallerkenen din.

Spis den som den er, eller med ei skive rista brød med smør på. Mmmm!

Antwerpen sentralstasjon

Denne typen hendingar får tårene til å trille på meg. Kjensla det vekker i meg er gleda over å jobbe målretta for å innstudere noko, framføre det, vinne publikum og motta applausen. Når du står der, og er aktør, er du hundre prosent fokusert på oppgåva. Etterpå er det ei deilig forløysing, ein tilstand av eufori fordi du har klart det, fordi det gjekk bra. Eg unner alle å kjenne dette på ein eller annan måte, i ei eller anna uttrykksform.

Og viss nokon vil arrangere ei danseoppvising som tek pusten frå dei reisande på Oslo S så står eg først i køen. Eg er med!